ബ്രേക്ക് അപ്പ് ആയോ,പാറ്റ, എലി, പച്ചക്കറികൾ എന്നിവയ്ക്ക് എക്സിന്റെ പേരിടാം; പ്രണയദിനത്തിൽ വ്യത്യസ്ത പരിപാടിയുമായി മൃ​ഗശാലകള്‍

ഈ വർഷത്തെ പ്രണയ ​ദിനത്തിൽ ബ്രേക്ക് അപ്പ് ആയ യുവതീ- യുവാക്കൾക്കായി വ്യത്യസ്ത പരിപാടിയുമായി അമേരിക്കയിലെ മൃ​ഗശാല. ന്യൂയോർക്കിലുളള ബ്രോങ്ക്സ്, ടെക്സാസിലെ സാൻ ആന്റോണിയോ, ഒഹായൊയിലെ കൊളംബസ് എന്നീ മൃ​ഗശാലകളാണ് വേറിട്ട പരിപാടി സംഘടിപ്പിക്കുന്നത്. പാറ്റകൾ, പുഴുക്കൾ, എലികൾ തുടങ്ങിയ ജീവികൾക്ക് കാമുകന്റേയൊ കാമുകിയുടേയൊ പേരിടുന്നതാണ് പരിപാടി.

സം​ഗതി അല്പം രസകരമായ പരിപാടിയാണെങ്കിലും ഇത്തരം ജീവികളുടെ സംരക്ഷണം കൂടിയാണ് മൃ​ഗശാലകൾ ലക്ഷ്യമിടുന്നത്. ബ്രേക്ക് അപ്പ് കഴിഞ്ഞ് സിം​ഗിളായിരിക്കുന്നവർക്ക് മധുര പ്രതികാരത്തിനുളള അവസരം കൂടിയാണ് മൃ​ഗാശാലകൾ വാലന്റൈൻസ് ദിനത്തിൽ ഒരുക്കുന്നത്. 'നെയിം എ റോച്ച്' എന്ന പേരിലാണ് ബ്രോങ്ക്സ് മൃ​ഗശാല ചടങ്ങ് സം​ഘടിപ്പിക്കുന്നത്. മഡ​ഗാസ്കർ ഹിസ്സിം​ഗ് കോക്രോച്ചിന് മുൻ കാമുകിയുടേയോ കാമുകന്റേയോ പേരിടാം എന്നാണ് റിപ്പോർട്ട്. പേരിടുന്നവർക്ക് മൃ​ഗശാല സർട്ടിഫിക്കറ്റും നൽകും.

സാൻ ആന്റോണിയോ മൃ​ഗശാലയിൽ സ്ക്വാഷ് യുവർ പാസ്റ്റ് എന്ന പേരിലാണ് പരിപാടി സംഘടിപ്പിക്കുന്നത്. അവിടെ പാറ്റ, എലി, പച്ചക്കറികൾ എന്നിവയ്ക്ക് എക്സിന്റെ പേരിടാം. ഇവയെ മൃ​ഗശാലയിലെ ജീവികൾക്ക് ഭക്ഷണമായി നൽകുകയും ചെയ്യും. പുഴുക്കൾക്ക് മുൻ കാമുകിയുടേയും കാമുകന്റേയും പേരിടാനാണ് കൊളംമ്പസ് മൃ​ഗശാല അവസരം നൽകിയിരിക്കുന്നത്. ഈ പുഴുക്കളെ അവിടെയുളള തേൻകരടികൾക്ക് ഭക്ഷണമായി നൽകും, അതിന്റെ വീഡിയോയും ചടങ്ങിൽ പങ്കെടുക്കുന്നവർ‌ക്ക് നൽകും.

പരിപാടിയിൽ പങ്കെടുക്കുന്നവരിൽ നിന്ന് പണം ഈടാക്കുന്നതാണ്. ബ്രോങ്ക്സ് മൃ​ഗശാല 15 ഡോളറാണ് ഈടാക്കുന്നത്. 20 ഡോളർ അധികം നൽകിയാൽ പ്രാണിയുമായി വെർച്വൽ മീറ്റിം​ഗിനും മൃ​ഗശാല അവസരമൊരുക്കിതരും. സാൻ ആന്റോണിയോ മൃ​ഗശാലയിൽ അഞ്ച് മുതൽ 25 ഡോളർ വരെയാണ് മുടക്കേണ്ടി വരിക. കൊളംമ്പസ് മൃ​ഗശാലയിൽ 15 ഡോളറാണ് ചിലവ്. കഴിഞ്ഞ വർഷം ബ്രോങ്ക്സ് മൃ​ഗശാലയിൽ സംഘടിപ്പിച്ച പരിപാടിയിൽ 3200 ൽ അധികം ആളുകൾ പങ്കെടുത്തതായി റിപ്പോർട്ടുകൾ പറയുന്നു.